Delles aportaciones nueves

Güei traemos cuatro temes nuevos, de cuatro grupos y estilos distintos, pero toos ellos bien prestosos y reconocíos: The waterboys, Enya, Barricada y Los Planetas. El trabayu hai qu'agradecé-ylu al collaciu Xosé Mon, que mos apurrió esta collaboración. Siguimos abiertos a cualquier collaboración, dubia, suxerencia, etc., 

¡Salú y Música!

 

THE WATERBOYS- EL BLUES DEL PESQUÍN

Prestaríame ser un pesquín
valtame na mar
llueñe de la tierra firme
y de les sos amargoses alcordances
echando fuera'l sedal
con abandonu y amor
ensin llendes debaxo de mi
a esceición del cielu estrelláu enriba
con lluz na tiesta
y tu nos mios brazos.

Prestaríame ser l'home del frenu
nun tren esbocáu
topetando sópitamente
escontra'l corazón de la tierra
como un cañón na agua
col llatíu de los durmientes
y el calor del carbón
cuntando les ciudaes que pasen de llargu
nuna nueche llena d'alma
con lluz na tiesta
y tu nos mios brazos.

Bonu, toi convencíu de que sedré esprendíu de sópitu
de los venceyos que me caltienen
de les calamiyeres que m'arreyen alredor
cayeré a la fin
y nesi malfadiáu intre
caltendréme firme
voi acaballar nesi tren
sedré'l pesquín
con lluz na tiesta
y tu nos mios brazos.

ENYA - PODRÍA SER

Podría ser qu'una estrella al atapecer
pose la so lluz sobre ti.
Oxalá cuando l'escuridá caya,
el to corazón te sía fiel.
Sigues un senderu solitariu,
¡qué llueñe tas del to llar!

La nueche llegó.
Ten enfotu y atoparás el camín.
La nueche cayó.
Agora una ilusión llate en ti.

Oxalá'l llamamientu de les solombres
s'alloñe.
Oxalá'l to viaxe siga
hasta que lluza'l día.
Cuando superes la nueche,
oxalá qu'espiertes y veas el sol.

La nueche llegó.
Ten enfotu y atoparás el camín.
La nueche cayó.
Agora una ilusión llate en ti.

Agora una ilusión vive en ti.

BARRICADA - LA OVEYA PRIETA

Facéi-y semeyes, tomái-y les buelgues
mirái-y bien los dientes
si aguanta rompéi-y la testera
la rutina de siempres.
Estos gochos tienen qu'aprender
quien ye equí'l que manda,
que pase mieu ente cuatro muries
dicíi-y que non fadie
si non se-yos trata asina
esto camuda de manes
déxa-yos que desesperen
esperando'l milagru.

Quixo dar un pasu p'alantre
quixo apiancar ensin calamiyeres
quixo vivir en llibertá
y eso naide lo entiende.
Cuando'l ñegru ye un home
ye un bon intre pal cazador
el blancu ponse nerviosu
y apienza a enllenar el cargador
... él foi quien tuvo la culpa
... d'atopase nel so camín.
Bales blanques, bales blanques
pa la oveya prieta.
Bales blanques, bales blanques
pa la oveya prieta.

Facéi-y semeyes, tomái-y les buelgues
mirái-y bien los dientes
si aguanta rompéi-y la testera
la rutina de siempres.
Cuando'l ñegru ye un home
ye un bon intre pal cazador
el blancu ponse nerviosu
y apienza a enllenar el cargador
... él foi quien tuvo la culpa
... d'atopase nel so camín.
Bales blanques, bales blanques
pa la oveya prieta.
Bales blanques, bales blanques
pa la oveya prieta.

 

LOS PLANETAS – PREBA ESTO

De tou lo que fixi años tras,
de tou eso deprendí.
¿Cómo podría dicir que
non voi facelo más?

Non pueo mentir.
Non tuvo tan mal.
Asina que non voi dicir que non,
porque pueo tar inda meyor.

Hai un millón de Mundios per afayar.
Te los podría amosar.
Pues venir conmigo
o pues quedate ehí.

Non hai que pagar,
de baldre pa ti.
Asina que non me digas que non,
porque pues tar inda meyor.